PRAKTIKALDIA AMAITZEN DA

Jadanik amaitu zaigu hainbeste denboran itxaroten egon garen praktikaldia,  eta egia esan, pena handia ematen dit, bertan, etxean bezala sentitu bai naiz, oso gustora.  Eskertzekoa benetan, Ikastolako edozein langilek eman didan gertutasuna, baita ere, gurasoek nirekin izan duten jarrera, oso langukoi agertu zaizkidalako eta horrek motibazioa eman dit ikasten ari naizenen honekin gogo handiz  jarraitzeko.

Aipatu bezala, bertako irakasle zein ikasketa buruak nirekin izan duen harremana oso gertukoa izan da, asko lagundu didate dudaren bat nuen garaian eta egindako gauza guztien azalpenak eman dizkidate inongo momentuan alde batera utzi gabe. Gainera, momentu batzuetan laguntza eskatu didate eta orduan, neu ere probetxugarria sentitu naiz.

Praktikaldi hauetan hainbat gauza ikasi ditudan arren, oraindik konziente naiz gauza asko ditudala ikasteko eta posible dela inoiz ez ikastea behar den adina, beti ere, arazo edota zailtasun berri ezberdinak agertzen direlako zein aurre egin beharko dizkiedanak. 

Esango nuke, gehien ikasi dudana haurrengana zuzentzean erabili behar den hitz egiteko modua dela, izan ere, ni LH1eko mailan egonik, eurak ulertu eta jarduerak aurrera eraman ahal izateko pentsatuta eta beraientzat moldatuta hitz egin behar baita. Baita ere, ikasle bakoitza oso ezberdina dela eta lehenik eta behin ikaslea ahalik eta ongien ezagutzea komeni dela, dituen gaitasun eta beharrak jakiteko. Beraiekin harremantzerako orduan ere, ezberdin jokatu behar dugula pertsona bakoitza ez delako berdina eta adin horretan balitekeelako konfiantza hartu bitartean eurak hain ondo ez sentitzea. Horrez gain, ikasleen aurrean irakasle batek duen posizioaz ere konturatu naiz, eta askotan oso polita den arren, une batzuetan egoera gazi gozoak gertatzen direla eta horri aurre egiteko gai izan behar garela, hala ere, zorionez, nire ikastolako profesional taldeak erakutsi didanez, beti daude gainerako lankideak esku bat botatzeko prest.

Irakasle-ikasle harremanari dagokionez, ikusi dut LHko  lehen urteetan behintzat oso garrantzitsua dela irakaslearen papera batipat ikasleentzako. Haur Hezkuntzatik irten ondorengo lehen urtea izanik irakaslearen babes handia eskatzen dutelako, beraz, irakasleak bere mugen barruan egon behar badu ere, momentu batzuetan maitakorra izan behar duela bere maitasuna ikasleei adieraziz.

Bizipenei dagokienez, oso momentu onak igaro ditut, tartean zailtasun bat edo beste izan dugun arren enuke esango momentu txarrik igaro dudanik, izan ere, guztion laguntzarekin buelta eman baitiogu. Askoz ere momentu hobe eta polit gehiago igaro ditut (tartean hainbat bitxikeria kontua hartuta), txarrak baino.

Beraz, hemendik ateratzen dudan ondorioa oso positiboa izan dela esango dut, anitz ongi pasatu dut, eta gauza asko ikasi ditudan arren, oraindik beste hainbeste eta askoz gehiago ikastea geratzen zaidala eta zerbait azpimarratzekotan bertako langileen gertutasuna (niganako eta ikasleenganako) goraipatuko nuke.

PROIEKTUAK

Jadanik laugarren astea ere igaro zaigu eta gero eta denbora gutxiago geratzen da praktikaldia amaitzeko. Denbora honetan zehar, gauza asko ikasi dudan arren, nahi nuen guztia ikusteko denborarik izan ez dudanaren sentsazioa daukat. Horren adibide, eskolan martxan dauden proiektu ezberdinak. Ni LH1. mailako gelan nagoenez, soilik ikasle hauek egiten dituzten proiektuen berri dut eta gustatuko litzaidake beste mailetan dituzten proiektuak ere ezagutzea, baina, tira, beste batean beharko du.

Nire gelako ikasleek aurrera ematen dituzten proiektuen artean daude HPI (Hobekuntza Pedagogiko Iraunkorra), KIVA, Hizkuntza Proiektua, Eskola Agenda 21 eta Ikasleen Harrera Plana.

Lehenengoari, HPIri, dagokionez, eskolak praktikan duen metodologia den arren, eskolak berak, proiektu gisa sailkatzen du. Metodologi edota proiektu honek (aurreko sarreretan aipatu dut jada), ikasleen parte hartzea sustatzen du. Horretarako, hiru mailak batera jarduten dira eta konpetentziak jarduera ezberdinen bidez burutzen dituzte. Jarduera hauek 3 geletako txokoetan daude banatuta, eta txoko bakoitzeko jarduerak zailtasun ezberdinetakoak dira maila bakoitzeko ikasleei egokituta daudelarik. Horrela, txoko bakoitzean maila ezberdinetako ikasleak biltzen dira eta elkarri laguntzen diote. Ekintza honi "zirkulazio autonomoa" deritze eta goizetan egiten dute. Gainontzeko irakasgaiak  (gaztelera, ingelesa, gorputz hezkuntza, musika) gela bakoitzak bakarrik egiten dute, nahiz eta egoeraren arabera maila bereko bi gelak elkartu daitezkeen.

KIVA eskola-jazarpena prebenitzeko eta jazarpen egoerak murrizteko proiektua da. Proiektu honen saioak heilean ordubeteko bi saio dira eta honen helburua jazarpen egoerei aurre egiteko moduak eta estrategiak, giza harreemanetan errespetuak duen garrantzia, taldean kide bakoitzan jokantzen duen papera edo rola... ikastea da. Hau aurrera eramateko, gelek banaka egiten dituzte saioak eta bertan jarduera ezberdinak izaten dituzte: eztabaidak, taldkeo lana, film laburrak ikusi... Ni egon nintzen saioan argazki batzuk interpretatu eta eurei buruz hausnarketak egin eta iritziak edota konponbideak bota zituzten, argazkiak haurrak agertzen ziren egoera ezberdinetan batzuk beldurtuta eta beste batzuk gustora. Proiektu honek garrantzi handia duenez, eskolan edozein leku edota garaitaan sentu daiteke bere presentzia izan ere, hormetan kartelak daude itsatsita, irakasleek KIVAko txalekuak janzten dituzte...

Hizkuntza proiektuari dagokionez, euskera lantzen dute bertan. Azpeitia herri euskalduna izanik ikastolan oso giro euskalduna dago eta nekez entzuten da beste hizkuntzarik. Hala ere, gaur egun atzerritarren kopuruak gora egin duenez, hauei aparteko laguntza emateko erabiltzen dute proiektu hau. Neuk, nola funtzionatzen duen ikusi ez dudan arren, badakit  bertan LH1,2 eta 3ko ikasle atzerritarrak biltzen direla euskararekin dituzten zailtasunekin  edota eduki berriak barneratzen laguntzeko.

Eskola Agenda 21, berriz, ia eskola gehienetan ikusi daitekeen proiektua da. Ni praktiketan nabilenetik, gaur izan dute lehenengo bilera eta bertan LH1etik LH6rako ikasleak biltzen dira (maila bakoitzetik bi ordezkari zein bilera bakoitzeko aldatzen diren). Bilera horretan, gai ezberdinei buruz hitz egiten dute eta ondoren ordezkari hauek euren ikaskideei helarazten die bileran aipatu dena. Gaur, adibidez, elektrizitatearen kontsumoaz jardun dira eta zer ondorio dituen eta nola aurreztu behar den energia.

Azkenik, Ikasleen Harrera Plana, aurrez aipatutako HPIrekin lotuta doala esango nuke. Ikasleek euren geletan bi harrera txoko txiki eta handi bat (48 ikasleak batera elkartzen direnerako) dituzte eta aste honetan izan dituzten aldaketa txikien ondorioz egunean 3 aldiz gutxienez biltzen dira bertan: goizean goiz, zerrenda pasatu eta eguneko arduradunarena egiteko; ondoren, zirkulazio autonomoa egin ostean, bakoitzak egin duena adierazi edota erakusteko; arratsalde hasieran, arratsaldeko plana adierazteko. Hala ere, irakasleak oharren bat eman behar duenean edota ikasle guztiak bildu behar dituenean   zerbait esateko txoko honetan biltzen dira beraz, baliteke egunean 3 aldiz baino gehiagotan biltzea.

IKASKETA PROZEDURAK

Hirugarren aste hau, ostirala jai denez gero, besteak baino motzagoa izan dugu, hala ere, gainontzekoak adina aprobetxatu dugu, beraz, oso sentsazio onekin amaitu dugu astea.

Aurreko sarreretan aipatu bezala, nire ikastolako metodologia, beti ezagutu izan dugun tradizionaletik oso ezberdina da. Metodologia hau, oso berezia iruditu zait eta bere oinarria ikaslearen askatasuna dela esango nuke. Metodologia honetan, ikasleek esploratzeko, probatzeko, ikertzeko... aukera izaten dute. Gehienetan, jolasak erabiltzen dituzte edota eginbeharrak jolas bihurtzen dituzte, horrela ikasleen interesa piztu ahal izateko.

Hiru aste hauetan, gehienbat zeregin antzekoekin jardun gara, eta zereginaren helburua mantendu den arren, ariketak edo egiteko moduak aldatu dituzte. Aipatu bezala, ikasgela, txoko ezberdinetan banatuta dago eta txoko bakoitzean jarduera edo egiteko ezberdinak egoten dira. Jarduera horien iraupena ezberdina izan ohi da, izan ere ikasleen interesaren araberakoa da eta batzuek, gehiago irauten dute ikasle gehiagoren interesa biltzen dutelako; besteek, aldiz, gutxiago. Jarduera guztiak, irakurketa kenduta, taldean egiten dituzte (4-6ko taldeetan).

Baliabide dikatikoei dagokienez, ez ditut baliabide asko ikusi, lehen aipatu bezala, asteak igaro ditzaketeelako aldatu gabe. Liburu eta ipuinak asko erabiltzen dituzte, bai bakarko edota taldeko irakurketa egiteko, eta liburuak mota ezberdinetakoak dira: ipuinak, komikiak, entziklopediak, euskaraz, erdaraz... Oraindik irakurtzen ez dakiten arren, ipuinetako marrazkiak interpretatzen ikasten ari dira, nahiz eta batzuetan (animalien entziklopedian, adibidez) argazkiak soilik agertzen diren.

Aste honetan, matematikekin pixkat gehiago zentratu dira eta hau lantzeko material ezberdina erabili dute. Ezberdina diot, izan ere, nik neuk, papera eta arkatzarekin banaka egin izan nuelako eta hauek ez dutelako horrelako ezer erabiltzen. Matematiketarako jarduera eta baliabide ezberdinak erabiltzen dituzte: kartak, eragiketa ezberdinak dituztenak; harriak, kopuru ezberdinetan sailkatzeko; arbeltxoak, elkarri eragiketa ezbedinak jarri eta ondoren besteenak egiten dituzte; dadoak, hauen alde bakoitzean zenbaki eta ikur ezberdinak agertzen dira tokatzen den eragiketa egiteko...

Proiektuetan, orain, dinosauroak ari dira lantzen eta izen konplexuak dituztenez, letra ezberdinak lantzen dituzte, bakoitzaren pixu eta altuerak, hezurrak...  Gaztelanian, asko ipuinen bidez egiten dute eta ingeles eta musikan, kantu eta antzerkiekin.

Ikasle hauek LHko 1.mailan daudenez, interes eta maila ezberdinak dituzte, eta hori asko nabari da, batipat idazterako orduan. Egun hauetako jarduerarik esanguratsuena, euren gelako zerrendak kopiatzea izan da eta ia gehienek hortan pasa dituzte egunak. Egun gutxi izan diren arren, euren ikasketa prozesua oso nabarmena izan da, izan ere, (bi ikasle nabarmendu ditut), astelehenean, idazten hasi zirenean ez ziren gai euren marradun koadernoan marren barruan idazteko eta gaur, osteguna, berriz, guztia bi marratxoen artean idatzi dute eta horrek egundoko zirrara sortu dit.

ANIZTASUNA

Bigarren asteari dagokionez, aniztasunari buruz mintzatuko gara. Gaur egun asko entzuten den hitz bat izanik, gure eskolan ere, aniztasun anitza nabari da. 

Nire gelari dagokionez, ikasle mutilen eta nesken kopurua oso antzekoa da, eta 48 ikasle horietatik 4 atzerritarrak (mutil bat eta hiru neska). Laurek denbora ezberdina daramate hemen eta euskararekin zailtasun batzuk dituzten arren, ondo moldatzen dira gainerako ikasleek ere laguntzen dietelako. Zailtasun batzuk dituztela aipatu dudan arren, ulermen maila nahiko altua dute eta oso ondo integratzen dira bertan, hori dela eta, ez dute aparteko laguntzarik jasotzen eta ordu guztiak gainontzeko ikaskideekin batera egiten dituzte.

Beste ikasle batek berriz, premia bereziak ditu autismoa duelako eta ikasle honek hainbat laguntza jasotzen ditu. Autismoa duen arren, oso autonomoa da eta ez du arazorik ikaskideekin harremantzerako orduan. Hala ere, ordu batzuetan, auxiliarra sartzen da gelan berari laguntzeko eta  beste batzuetan, logopeda etortzen da edota berarekin gelatik kanpo egoten da. Hauez gain, astean beste ordu bat izaten du igerilekura joaten dena baina hauek kenduta beste guztia ikaskideekin gelan egoten da eta eginbehar berak egiten ditu.

Nire gela LH1eko izanik, ikasle bakoitzaren gaitasunak nabarmentzen dira, gehienbat idazterako eta irakaurtzerako garaian. Batzuk erraz moldatzen diren bitartean, beste batzuk oraindik zailtasunak dituzten hizkiak identifikatzerako orduan, beraz, laguntza gehiago behar dute, hala ere, guztiek gero eta interes handiagoa erakusten dute hizkiekin lan egiterako orduan.

Jolasak aukeratzerako orduan ere ezberdintasunak nabarmentzen dira, izan ere, batzuek nahiago izaten dituzte oso mugikorrak diren jolasak (futbola, saski baloia, korrika...) eta beste batzuk berriz, euren artean kontuak esan edota mahai jolasetan ibili (xakea, partxisa...).

HEZKUNTZA KOMUNITATEA

Jadanik igaro da astebete eta banoa pixkanaka ikasgelako errutina barneratzen eta ikasleak ezagutzen. Lehen aste hau oso bizkor igaro zait, gelan oso gustora sentitzen bainaiz bai ikasleekin zein beste irakasleekin eta hauek asko laguntzen didate. Niretzat berria izanik, asko lagundu didatelako egunerokotasunera eogkitzen.

Lehenengo egunean, praktikaldia burutu nahi nuen maila aukeratzeko aukera eman zidaten eta lehenengo maila aukeratu nuen, izan ere, haur hezkuntzatik lehen hezkuntzarako aldaketa hori ikusi nahi nuelako. 

Ikasle hauek gainontzeko lehen hezkuntzako ikasleak bezala, goizeko 9:30etan sartzen dira eskolara eta eguerdiko 13:00ean irten tartean ordu erdiko (11:00-11:30)  jolasordua dutelarik. Arratsaldean berriz, 15:00etatik 17:00etara izaten dute tartean 20 minutuko jolas orduarekin.

Nire gelan 48 ikasle aurkitzen dira. Berez, 24ko bi gela dira, baina metodologia berriarekin dabiltzanez bi gelak elkartuta daude, eta bertan 48 ikasle, 2 irakasle eta auxiliar bat (ikasle baten premia bereziak direla medio) eta orain, ni gaude.

Aipatu bezala, metodologia berriarekin dabiltzanez, ordutegiaren banaketa hasieran arraroa egin zitzaidan, izan ere, goizetan, guztiak ekartu arte 20bat minutu edo jolas librea izaten dute eta honen ondoren zirkulazio autonomoa deritzena hasten dute. Hemen, LH1, LH2 eta LH3ko ikasle guztiek batera egiten dute. Bertan, hiru mailetako gelak gehi pasilloak irekitzen zaizkie eta hauetan hainbat txoko daude ezarrita. Txoko bakoitzean, proposamenak  deitzen dieten ekintza edota jarduerak daude eta ikasleek nahi duten txokoan ezarriz ekintza hauetan parte hartzen dute. Txoko bakoitzean ikasle kopuru bat egon daiteke, ezin da gehiago egon eta adin ezberdinetako ikasleak nahastu daitezke txoko bakoitzean, horrela, zailtasunik izanez gero, zaharrenek gazteagoei lagun diezaieten. 

Proposamenetan egiteko ezberdinak daude, partxisa, xakea, damak, kartak, liburuak irakutzeko txokoak, mahai jolasak... Egia esan, txoko eta ekintza pila bat dituzte eta honek gauza ezberdinak egiteko aukera ematen die. Zirkulazioa autonomoaren helburua, ikasleak modu autonomo batean ekintzak egin eta hauetan arazoren bat izanez gero arazoa euren kasaka konpontzea da eta horretarako beste ikaskideen laguntza izaten dute, zeinek gaitasun eta jakinduria maila ezberdina duten 3 maila ezberdinetako ikasleak batera dabiltzalako. 

Ondoren, jolasordua izaten dute eta hemendik bueltan berriz ordu erdiz edo zirkulazioa autonomoan jarraitzen dute. Hau amaitzean, gelan bi harrera txoko dituzte eta bertan, gela bakoitza (24 ikasle eta irakasle 1) esertzen dira. Hemen, irakasleak ikasleei galdetzen die ea non ibili diren eta zer egin duten eta ikasleek gainerako ikasleei kontatzen die. Honen ostean, matematika, ingelesa, gaztelania... izaten dute. 

Arratsaldeak berriz, hiru zatitan banatzen dituzten, aipatu bezala 20 minutuko jolasordua edota proiektua, gorputz hezkuntza edota goian aipatutako beste klase batzuk.

Harrera txokoen funtzionamenduak ikusmina deitu zidan izan ere, bertan, goizean elkartzen dira eguneko data idazteko, eguneko eginbeharrak azaltzeko, lehen aipatu bezala, egin dutena ikaskideei azaltzeko edota irakasleak oharren bat eman behar duenean ere, bertan elkartzen dira eta bertan eseri  bezain laster, ikaslek guztiak ixiltzen dira irakasleari entzuteko, bertako araua ondo barneratuta daukate.

Gelaren antolakuntzari dagokionez, berriz, gela nahiko handia da, izan ere, lehen bi ikasgela ziren baina horma bota eta orain bi gelekin bat eginda dago. Bertan, bi harrera txoko, proposamenetako 9 txoko eta ikasleen apalak daude, gainera gela guztiak batera elkartu behar duenerako harrera txoko handi bat dute gelan bertan. Material guztia ere eskura dute, beraz, ikasleek nahiko askatasun handia dutela esango nuke.

Aurkezpena

Kaixo:

Ni Lorea naiz, 20 urte ditut eta Errezilen bizi naiz. Lehen Hezkuntzako gradua ikasten ari naiz eta bihar, bigarren urteko praktikaldiak hasiko ditut Azpeitiko Ikasberri Ikastolan.

Graduko lehen praktikaldian izango ditudan arren, aurrez, beste praktika batzuk ere burutu ditut, izan ere, goi mailako Gizarte Integrazioaren zikloa egina dut. Hala ere, oraingo hau, aurrekoarengandik guztiz ezberdina izango dela badakit, (kontuan izanik, aurreko praktikaldiak autismoa duten umeekin egin nituela) baina hala ere irrikitan nago hasteko eta ikasle zein irakasle berriak ezagutzeko.

Iruditzen zait, praktikaldian zehar, ondo pasatuko dudala eta asko ikasteaz gain, asko gustatuko zaidala. Izan ere, nire lehen hezkuntza garaiko oroimen oso polit eta estuak ditut eta berriro horrelako zerbait bizitzeko aukera izango dudala somatzen dut. Bestalde, jakin mina ere badut, izan ere, aurrez aipatu bezala, ni Errezil bezalako herri txiki batekoa izanik, eskolako geletan ikasle gutxi izaten ginen (nahiz eta bi adinetako ikasleak batera egon), eta adin horretako ikasleen gela haundi batek nolako funtzionemandua duen ikusteko gogoz bainago. 

Esan bezala, nire lehen hezkuntza garaiko oroimen politak ditut, eta esango nuke, nire bizitzako etaparik garrantzitsuenetarikoa izan zela, bertan ezagutu nituelako nire lagunak, zein, gaur egun, oso garrantzitsuak diren niretzako, nire parte haundi bat direlako. Praktikaldi honetan, nahiz eta nik eraginik haundirik ez izan, izango ditudan ikasleen etapa honetako zati bat izango naizela iruditzen zait eta horrek benetan unkintzen nau. Beraz, prest nago datorkidanari gogor heldu eta ondo pasatuz asko ikasteko!